बारामा लागूऔषध कारोबारी र प्रहरीबीच गोली हानाहान, एक पक्राउ

प्रहरीले बाराको निजगढ नगरपालिका–१३ स्थित भक्तलाल खोलाको बगरबाट अवैध लागूऔषध गाँजा र हतियारसहित एक जनालाई नियन्त्रणमा लिएको छ । 

सो क्रममा प्रहरी र लागूऔषध कारोबारीबीच गोली हानाहानसमेत भएको थियो । शनिबार राति इलाका प्रहरी कार्यालय निजगढ बाराबाट प्रहरी निरीक्षक विकास थपलियाको कमाण्डमा अस्थायी प्रहरी पोष्ट रतनपुर बारा समेतबाट खटिएको संयुक्त प्रहरी टोलीले गस्ती गर्ने क्रममा उनीहरुलाई भेटेको हो । 

करिब ८–१० जनाको समूहले भक्तलाल खोलाको बगरमा अवैध लागूऔषध गाँजा ओसारपसार र खरिद बिक्री गरिरहेका थिए ।

लागूऔषध तस्करहरूले प्रहरी टोलीलाई देख्नसाथ फायर गरेकोले प्रहरी टोलीले प्रतिकारस्वरुप ठूलो चाइनिज पेस्तोलबाट ५ राउण्ड गोली फायर गरेको जिल्ला प्रहरी कार्यालय बाराका प्रवक्ता तथा प्रहरी नायब उपरीक्षक गौतम मिश्रले जानकारी दिए । 

उनका अनुसार तस्करहरू मध्येका मकवानपुर हेटौडा उपमहानगरपालिका–६ बस्ने वर्ष ४७ का ईमान सिंह तामाङलाई पक्राउ गरिएको हो । घटनास्थलबाट ५ ओटा सेतो बोराभित्र लुकाई छिपाई राखेको १०२ के.जि. अवैध लागू औषध गाँजा पनि बरामद भएको छ ।

तामाङको साथबाट लोड भएको १ थान भरुवा बन्दुक पनि बरामद भएको गौतमले बताए । तामाङलाई हातहतियार खरखजाना र लागू औषध नियत्रण ऐन, २०३३ बमोजिम थप अनुसन्धान भइरहेको प्रहरीले जनाएको छ ।