चीन र भारतबाहेक दक्षिण एसियाली देशहरु मिलेर नयाँ संगठन स्थापना गरेका छन् । चीन–दक्षिण एसियाली राष्ट्र गरिबी निवारण तथा सहकार्य विकास केन्द्रको स्थापना गरिएको हो ।
बिहीबार चीनको चोङचिङ सहरमा संगठनको घोषणा गरिएको थियो । गरिबी घटाउन शक्ति तथा स्रोत एकीकृत गर्ने र दक्षिण एसियाली देशको आर्थिक विकास तथा जनजीविका सुधारका लागि ज्ञान आदानप्रदान गर्ने संगठनको उद्देश्य छ ।
चीनको विदेश मन्त्रालयका अनुसार कार्यक्रममा चीनका सहायक विदेशमन्त्री वु जिआङहाओ र चीनका लागि नेपाल, अफगानिस्तान, पाकिस्तान, श्रीलंका र बंगलादेश राजदूतले सम्बोधन गरेका थिए ।
गत अप्रिलमा कोरोना महामारीबारे दक्षिण एसियाली विभिन्न देशका विदेशमन्त्रीसँगको छलफलमा चीनका स्टेट काउन्सिलर तथा विदेशमन्त्री वाङ यीले संगठन स्थापनाका लागि प्रस्ताव गरेका थिए ।
अन्य देशको पनि समर्थन पाएपछि संगठन स्थापना गरिएको हो । भारत भने उक्त छलफलमा निम्ता पाए पनि सहभागी भएको थिएन ।
© न्युज सोसाइटी प्रा.लि.मा सर्वाधिकार सुरक्षित- 2022,
Powered by: Nectar Digit