पाकिस्तान दूतावासद्वारा कश्मीरबारे छलफल आयोजना

काठमाडौंस्थित पाकिस्तान दूतावासले बिहीबार ‘आत्मनिर्णयबारे कश्मीरवासीको अधिकार’ सम्बन्धमा छलफल आयोजना गरेको छ । संयुक्त राष्ट्र संघको आत्मनिर्णय अधिकार दिवसको अवसरमा उक्त कार्यक्रम आयोजना गरिएको हो ।

आफ्नो सन्देशमा पाकिस्तानका राष्ट्रपति आरिफ अल्वीले संयुक्त राष्ट्र आयोगलाई जम्मु कश्मीरको बारेमा गरिएको संकल्पको स्मरण गराए । सात दशक बिते पनि जम्मु कश्मीरमा विवाद भइरहेको उनले जनाए । उनले उक्त क्षेत्रमा अन्यायपूर्ण हत्या, फर्जी मुठभेड र अमानवीय कारबाही भइरहेको पनि बताए । 

पाकिस्तानका प्रधानमन्त्री इमरान खानले आफ्नो सन्देशमा जम्मु कश्मीरवासीको आधारभूत मानवीय अधिकारका विषयमा पाकिस्तानको प्रतिबद्धता दोहो¥याए । साथै, विश्व समुदाय र राष्ट्रसंघले कश्मीरवासीका लागि गरेको प्रतिबद्धता पूरा हुने आशामा यहाँको तीन पुस्तादेखिका व्यक्ति पर्खाइमा रहेको उनको भनाइ थियो । 

पाकिस्तानका विदेशमन्त्री शाह महमूद कुरैशीले कश्मीरमा भएका गम्भीर मानवीय उल्लंघनका घटनाको जाँच गर्न माग गरे । उनले आफ्नो सन्देशमा आत्मनिर्णयको अधिकारका लागि कश्मीरवासीको साथमा सधैं पाकिस्तान रहेको पनि जनाए । 

नेपालका लागि पाकिस्तानका राजदूत सैयद हैदर शाहले लामो समयदेखिको यो विवादमा संयुक्त राष्ट्रसंघले प्रतिबद्धता गरेअनुसारको काम नहुँदा यस क्षेत्रको शान्ति र स्थिरता खतरा उत्पन्न भएको बताए । कार्यक्रममा सहभागी मानवअधिकार कर्मीले जम्मुकश्मीरमा मानवअधिकारको बिग्रँदो अवस्थाबारे चिन्ता व्यक्त गरे । कार्यक्रममा मानवअधिकारकर्मीका साथै विश्लेषक, लेखक तथा पत्रकारहरु सहभागी थिए ।