२९ लाख भ्रष्टाचार आरोपमा मुगुको छायाँनाथ रारा नागरपालिकाका इन्जिनियरसहित पाँचजनाविरुद्ध मुद्दा

पर्दाफास रिपोर्टर
ब‌ैशाख २१, २०७९

अख्तियार दुरुपयोग अनुसन्धान आयोगले मुगुको छायाँनाथ रारा नगरपालिकाका इन्जिनियर महेशसिंह कठायत र असिस्टेन्ट सब इन्जिनियर हस्त बहादुर मल्लका साथै अन्य तीनजनाविरुद्ध भ्रष्टाचारको आरोपमा बुधबार विशेष अदालतमा मुद्दा दायर गरेको छ ।

उनीहरुले नगरपालिकाको वडा नं. २ मा पर्ने पैदल बाटोमा पक्की सिँढी निर्माण गर्न आर्थिक वर्ष २०७४/७५ मा विनियोजन भएको रकम हिनामिना गरेको आरोपमा मुद्दा दायर गरिएको हो ।

आयोगका अनुसार भएको कामभन्दा धेरै काम देखाई नापीको किताबमा मूल्यांकन गरेका थिए । त्यस्तै उनीहरुलाई प्रमुख प्रशासकीय अधिकृत पिताम्बर सारु र उपभोक्ता समितिका अध्यक्ष राममाया मल्ल र कोषाध्यक्ष रत्नादेवी हमालले पनि साथ दिएको अख्तियारले बताएको छ ।

उनीहरुले २९ लाख ७७ हजार ८२१ रुपैयाँ ११ पैसा भ्रष्टाचार गरेकाले उनीहरुबाट उक्त रकमबराबरको बिगो र आवश्यक कारबाहीको माग गर्दै मुद्दा दायर गरिएको हो।