सेनाको टेण्डरमा कमाएको रकम किर्ते गरेर हत्याएको आरोपमा रेमण्ड सपका संचालक सञ्जय अधिकारी पक्राउ

प्रहरीले चर्चित रेमण्ड सपका संचालक तथा सार्वजनिक ब्यक्तित्व सञ्जय अधिकारी र उनका छोरा समिर अधिकारी सहित चारजनालाई किर्ते तथा ठगी आरोपमा पक्राउ गरेर मुद्दा चलाएको छ ।

 
महानगरीय प्रहरी परिसर काठमाडौंका अनुसार नेपाली सेनाका लागि ३५ हजार थान छालाको बुट सप्लाई टेण्डरमा साझेदार रहेका अधिकारीले अन्य  साझेदारलाई थाहै नदिई किर्ते गरेर रकम निकालेको आरोपमा पक्राउ गरेको हो । 

परिसरका अनुसार फुट केयर इन्डस्ट्रीज प्रालीका साझेदार रहेका अधिकारीले प्रभु बैंकमा यो कम्पनीको चेक र संचालक समितिको विवरण तथा हस्ताक्षर किर्ते गरेका हुन् । उनी माथि ४ करोड ८७ लाख रुपैयाँ किर्ते गरेर निकालेको आरोप लागेको छ । 

परिसर प्रमुख एसएसपी अशोक सिंहका अनुसार ठेकेदार कम्पनीका अन्य संचालक शिलबहादुर केसी र नोखबहादुर थापाले किर्ते आरोपमा जाहेरी दिएपछि अधिकारी सहित चारजनालाई पक्राउ गरिएको हो । 

घटनामा शिलबहादुरले आफ्नै छोरा सुवर्ण केसी बिरुद्ध समेत जाहेरी दिएका छन् । पक्राउ पर्ने चौथो आरोपीमा कृष्ण भट्टराई रहेका छन् । 

पक्राउ परेका अधिकारी सत्तारूढ नेकपा देखि विपक्षी नेपाली कांग्रेशसम्म नेता, उच्च सरकारी अधिकारी र सुरक्षा निकायमा पहुँच भएका ब्यक्ति हुन् । उनले प्रयाेग गर्ने सामाजिक सञ्जालमा उच्च पदस्थ अधिकारीसँगकाे हिमचिम रहेका तस्वीर हेर्न सकिन्छ । 

यसबाहेक अधिकारी नेपाल प्रहरीका लागि एकजना सहयाेगी पनि हुन् । 

परिसरका एक अधिकारीका अनुसार ब्यवहार बिग्रेपछि अधिकारीकाे दशा सुरू भएकाे टिप्पणी गर्छन् । 

परिसरले चारै जना बिरुद्ध किर्ते मुद्दामा अदालतबाट म्याद लिएर अनुसन्धान थालेको एसएसपी सिंहले बताए ।